Святителю Николаю
Чудотворцу
О, всехвальный и всечестный архирею, великий чудотворче, святителю Христов,
отче Николае, человече Божий и верный рабе, муже желаний, сосуде
избранный, крепкий столпе церковный, светильниче пресветлый, звездо,
осиявающая и освещающая всю вселенную!
Ты еси праведник, яко финикс
процветший, насажденный во дворех Господа своего, живый в Мирех, миром
благоухал еси и миро приснотекущее благодати Божия источаяй.
Твоим
шествием, пресвятый отче, море освятися, егда многочудесныя твоя мощи
шествоваху во град Барский, отвостока до запада хвалите имя Господне.
О,
преизрядный и предивный чудотворче, скорый помощниче, теплый заступниче,
пастырю предобрый, спасающий словесное стадо от всяких бед!
Тебя
прославляем и тебя величаем, яко надежду всех христиан, источника чудес, защитителя верных, премудрого учителя, алчущих кормителя, плачущих веселие,
нагих одеяние, болящих врача, по морю плавающих управителя, пленников
освободителя, вдов и сирот питателя и затупника, целомудрия хранителя,
младенцев кроткого наказателя, старых укрепление, постников наставника,
труждающихся упокоение, нищих и убогих изобильное богатство.
Услыши нас,
молящихся тебе и прибегающих под кров твой, яви представительство твое о
нас к Вышнему и исходатайствуй твоими благоприятными молитвами вся
полезная ко спасению душ и телес наших.
Сохрани святую обитель сию, всякий
град и весь, и всякую страну христианскую, и люди живущая от всякого
озлобления помощию твоею. Вемы бо, вемы, яко может молитва праведного,
поспешествующая во благое, тебе же праведного, по Благословенной Деве
Марии, предстателя ко Всемилостливому Богу имамы, и к твоему, преблагий
отче, теплому ходатайству и заступлению смиренно притекаем.
Ты нас
соблюди, яко бодрый и теплый пастырь, от всяких врагов, губительства,
труса, града, глада, потопа, огня, меча, нашествия иноплеменников, и во
всяких бедах и скорбях наших подай нам руку помощи, и отверзи двери
милосердия Божия: понеже недостойны есмы зрети высоту небесную, от
множества неправд наших, связаны узами греховными, и николиже воли
Создателя нашего сотворихом, ни сохранихом повелений Его.
Тем же преклоняем
колена сокрушенна и смиренна сердца нашего к Зиждителю своему, и твоего
отеческого заступления к Нему просим: помози нам, угодниче Божий, да не
погибнем со беззакониями нашими, избави нас от всякого зла и от всякия
вещи супротивныя, управи ум наш и укрепи сердце наше в правой вере, в
нейже твоим предстательством и ходатайством, ни ранами, ни прещением, ни
мором, ни коем гневом от Создателя своего умалены будем, но мирное зде
поживем житие и да сподобимся видети благая на земле живых, славяще Отца и
Сына и Святого Духа, ныне и присно и во веки веков. Аминь.
Коррекция судьбы / Молитвы
"Отче наш", "Богородица"
Красота
